د ژوند بهیر
ددریاب په دود بهیږي
د انسان د ژوند بهیر
مونږ د چا د خوب تعبیر یو
چې ټول عمر یو زهیر
خلک لاړل تر کیهانه
لاره باسي تر اسمانه
مونږ په خپلو کې جنګیږو
بیا شاکي یو د تقدیر
مونږ د چا د خوب تعبیر یو
چې ټول عمر یو زهیر
ډیر وختونه په موږ تیر شول
فرصتونه لاړل هیر شول
لا تر څو په اور کې سوزو
هر ې ګړۍ ناست یو په ویر
مونږ د چا د خوب تعبیر یو
چې ټول عمر یو زهیر
دلته جوړ مرګی مرګی دی
څوک مو خپل څوک اجنبی دی
هیڅ خوښي دلته کې نشته
یو دردمند په زړه دلګیر
مونږ د چا د خوب تعبیر یو
چې ټول عمر یو زهیر
نه خواخوږی نه دلدار شته
نه زموږ څوک مدد ګار شته
هرې خوا ته ناچاري ده
پناه غواړو له قدیر
مونږ د چا د خوب تعبیر یو
چې ټول عمر یو زهیر
لا تر څو به محتاج ژوند وي
د پردو دا بد چلند وي
لږ همت مونږ ته پکار دی
و قوت شو په تدبیر
مونږ د چا د خوب تعبیر یو
چې ټول عمر یو زهیر
ربه ته مو مددګار شې
ته مو مل د ژوندپه لار شې
مونږ له تانه امان غواړو
ته کریم یې ته بصیر
مونږ د چا د خوب تعبیر یو
چې ټول عمر یو زهیر